ထိုင်းကွန်ဒိုဈေးကွက်တွင် မြန်မာနိုင်ငံက အဆင့် (၂) သို့ တက်လှမ်းလာ

ဘန်ကောက် — ထိုင်းနိုင်ငံ၏ ကွန်ဒိုမီနီယံဈေးကွက်တွင် နိုင်ငံခြားသားဝယ်ယူသူများသည် အဓိကအင်အားစုအဖြစ် ဆက်လက်တည်ရှိနေပြီး၊ ၂၀၂၅ ခုနှစ်အတွင်း တရုတ်နိုင်ငံသားများမှာ ဝယ်ယူမှုပမာဏ လျော့ကျသွားသော်လည်း ထိပ်ဆုံးနေရာတွင် ဆက်လက်ရပ်တည်နေကာ မြန်မာဝယ်ယူသူများမှာမူ သိသိသာသာတိုးတက်လာပြီး ဒုတိယနေရာသို့ ရောက်ရှိလာခဲ့သည်။

အိမ်ခြံမြေ သတင်းအချက်အလက်ဌာန (REIC) ၏ ယာယီညွှန်ကြားရေးမှူး Narongpol Prabhanirin က ၂၀၂၅ ခုနှစ်၊ စတုတ္ထသုံးလပတ်တွင် နိုင်ငံခြားသားများထံသို့ ကွန်ဒိုလွှဲပြောင်းမှုစုစုပေါင်း ၃,၈၈၈ ယူနစ်ရှိခဲ့ပြီး ယခင်သုံးလပတ်ထက် ၁.၁ ရာခိုင်နှုန်းနှင့် ယခင်နှစ် အလားတူကာလထက် ၉.၃ ရာခိုင်နှုန်း မြင့်တက်လာကြောင်း ပြောကြားခဲ့သည်။ လွှဲပြောင်းမှုတန်ဖိုးမှာ ယခင်နှစ်ထက် အနည်းငယ်သာ မြင့်တက်ခဲ့သော်လည်း ယူနစ်အရေအတွက် ပိုမိုများပြားလာခြင်းမှာ အထူးသဖြင့် အလယ်အလတ်တန်းစား ကွန်ဒိုများ၏ ပျမ်းမျှဈေးနှုန်းများ ကျဆင်းသွားခြင်းကို ရောင်ပြန်ဟပ်နေသည်။

၂၀၂၅ ခုနှစ် တစ်နှစ်လုံးအတွက် နိုင်ငံခြားသားများ ဝယ်ယူလွှဲပြောင်းသည့် ကွန်ဒိုယူနစ်ပေါင်း ၁၄,၈၉၉ ယူနစ်ရှိခဲ့ပြီး ၂၀၂၄ ခုနှစ်ထက် ၂.၂ ရာခိုင်နှုန်း တိုးတက်လာခဲ့သည်။ သို့သော်လည်း စုစုပေါင်းလွှဲပြောင်းမှုတန်ဖိုးမှာ ဘတ် ၆၀.၉၂ ဘီလီယံရှိပြီး ၁၀.၇ ရာခိုင်နှုန်း ကျဆင်းသွားခဲ့သည်။ နိုင်ငံတစ်ဝန်း လွှဲပြောင်းပေးခဲ့သည့် ကွန်ဒိုယူနစ်အားလုံး၏ ၁၄.၇ ရာခိုင်နှုန်းနှင့် စုစုပေါင်းတန်ဖိုး၏ ၂၅ ရာခိုင်နှုန်းမှာ နိုင်ငံခြားသား ပိုင်ဆိုင်မှုများ ဖြစ်သည်။

ထိုင်းဥပဒေအရ နိုင်ငံခြားသားများသည် ကွန်ဒိုမီနီယံစီမံကိန်းတစ်ခု၏ ရောင်းချနိုင်သော ဧရိယာစုစုပေါင်း၏ ၄၉ ရာခိုင်နှုန်းအထိ ပိုင်ဆိုင်ခွင့်ရှိသည်။

အဓိကပြည်နယ်များ

နိုင်ငံခြားသားများ အများဆုံးဝယ်ယူသည့် ပြည်နယ် (၁၀) ခုတွင် ဘန်ကောက်က ယူနစ်ပေါင်း ၇,၀၂၉ ယူနစ် (ဘတ် ၃၅.၃၉ ဘီလီယံ) ဖြင့် ထိပ်ဆုံးမှ ဦးဆောင်နေပြီး၊ ချောင်ဘူရီ (Chonburi) က ၄,၁၆၄ ယူနစ် (ဘတ် ၁၁.၅၉ ဘီလီယံ) နှင့် ဖူးခက် (Phuket) က ၁,၁၉၀ ယူနစ် (ဘတ် ၆.၀၉ ဘီလီယံ) ဖြင့် အသီးသီး နောက်ကလိုက်နေသည်။ အခြားပြည်နယ်များတွင် ချင်းမိုင်၊ ပရာကျွတ်ကီရီခန် (Prachuap Khiri Khan)၊ စမွတ်ပရာကန်၊ စူရတ်ဌာနီ၊ ရယောင်း၊ ဖက်ချာဘူရီ နှင့် နွန်သဘူရီ တို့ ပါဝင်သည်။

တရုတ်နိုင်ငံက နံပါတ် (၁) နေရာတွင် ဆက်ရှိနေ

လူမျိုးအလိုက် ကြည့်မည်ဆိုပါက တရုတ်ဝယ်ယူသူများသည် ဝယ်ယူမှုလျော့ကျသွားသော်လည်း အကြီးဆုံးအုပ်စုအဖြစ် ဆက်လက်ရှိနေသည်။ ၂၀၂၅ ခုနှစ်တွင် တရုတ်နိုင်ငံသားများထံသို့ ယူနစ်ပေါင်း ၄,၉၄၀ လွှဲပြောင်းပေးခဲ့ပြီး ယခင်နှစ်ထက် ၁၂.၉ ရာခိုင်နှုန်း လျော့ကျခဲ့ကာ စုစုပေါင်းတန်ဖိုးမှာလည်း ၃၀ ရာခိုင်နှုန်း ကျဆင်း၍ ဘတ် ၁၈.၅၉ ဘီလီယံ ရှိခဲ့သည်။ သို့သော်လည်း ၎င်းတို့သည် နိုင်ငံခြားသား ကွန်ဒိုလွှဲပြောင်းမှု စုစုပေါင်း၏ ၃၃ ရာခိုင်နှုန်းနှင့် တန်ဖိုးစုစုပေါင်း၏ ၃၁ ရာခိုင်နှုန်းကို ပိုင်ဆိုင်ထားဆဲဖြစ်ပြီး အဓိကအားဖြင့် ဘန်ကောက်၊ ချောင်ဘူရီနှင့် ချင်းမိုင်တို့တွင် ဝယ်ယူကြခြင်းဖြစ်သည်။

မြန်မာနိုင်ငံက ဒုတိယနေရာသို့ ခုန်တက်လာ

မြန်မာနိုင်ငံသားများသည် ယူနစ်ပေါင်း ၁,၉၆၈ ယူနစ်ဖြင့် ဒုတိယနေရာသို့ ရောက်ရှိလာပြီး ယခင်နှစ်ထက် ၄၁.၈ ရာခိုင်နှုန်းအထိ သိသိသာသာ မြင့်တက်လာခဲ့သည်။ သို့သော်လည်း လွှဲပြောင်းမှုတန်ဖိုးမှာ ၁၂.၅ ရာခိုင်နှုန်း လျော့ကျပြီး ဘတ် ၆.၁၆ ဘီလီယံ ရှိခဲ့သည်။ ဝယ်ယူမှုများကို ဘန်ကောက်၊ စမွတ်ပရာကန် နှင့် ချင်းမိုင်မြို့တို့တွင် အဓိကပြုလုပ်ကြသည်။

ရုရှားဝယ်ယူသူများမှာ ယူနစ်ပေါင်း ၁,၁၇၂ ယူနစ် (၈.၆ ရာခိုင်နှုန်း တိုးတက်) ဖြင့် နောက်တွင်ရှိနေပြီး လွှဲပြောင်းမှုတန်ဖိုးမှာ ၃၀.၃ ရာခိုင်နှုန်း မြင့်တက်ကာ ဘတ် ၄.၇၇ ဘီလီယံ ရှိခဲ့သည်။ ၎င်းတို့သည် အဓိကအားဖြင့် ဖူးခက်၊ ချောင်ဘူရီနှင့် ပရာကျွတ်ကီရီခန်တို့တွင် ဝယ်ယူခဲ့ကြသည်။ အခြားအဓိကဈေးကွက်များတွင် ထိုင်ဝမ်၊ အမေရိကန်၊ ပြင်သစ်၊ ဗြိတိန်၊ ဂျာမနီ၊ အိန္ဒိယနှင့် စင်ကာပူတို့ ပါဝင်သည်။

Narongpol ၏ ပြောကြားချက်အရ တရုတ်နိုင်ငံမှ လွှဲပြောင်းမှုများ ကျဆင်းသွားရခြင်းမှာ တရုတ်နိုင်ငံ၏ တင်းကျပ်သော ငွေကြေးစီးထွက်မှု ထိန်းချုပ်ရေးမူဝါဒများနှင့် ထိုင်းနိုင်ငံ၏ တရားမဝင် "Grey Capital" (မီးခိုးရောင်စီးပွားရေးလုပ်ငန်းများ) အပေါ် တင်းကျပ်သော အရေးယူဆောင်ရွက်မှုများကြောင့် ဖြစ်နိုင်ကြောင်း၊ ထို့ကြောင့် လက်ရှိဝယ်ယူနေသူများသည် နေထိုင်ရန်၊ ငှားရမ်းရင်းနှီးမြှုပ်နှံရန် သို့မဟုတ် စီးပွားရေးအရ ရေရှည်နေထိုင်ရန် တကယ်လိုအပ်သူများသာ ဖြစ်ကြောင်း ဆိုသည်။

ဤကဲ့သို့ ပြောင်းလဲမှုများကြောင့် ထိုင်းနိုင်ငံ၏ ကွန်ဒိုမီနီယံဈေးကွက်သည် ၂၀၂၆ ခုနှစ်သို့ ကူးပြောင်းရာတွင် ပိုမိုခိုင်မာအားကောင်းလာကြောင်း ၎င်းက ဖြည့်စွက်ပြောကြားခဲ့သည်။

Ref: Khaosod English